ମା ଭୁବନେଶ୍ଵରୀ ମନ୍ଦିର

ମା ଭୁବନେଶ୍ୱରୀ ଆଚାର୍ଯ୍ୟ ବିହାରବାସୀଙ୍କ ଆରାଧ୍ୟ ଦେବୀ। ମନ୍ଦିରର ଲିଖିତ ତଥ୍ୟ ଅନୁସାରେ, ମା ଙ୍କର ବିଗ୍ରହ ଉଣେଇଶହ ନବେ (1990) ମସିହାରେ ପ୍ରତିଷ୍ଠା ହୋଇଥିଲା। କିନ୍ତୁ ତାହାର ଅନେକ ବର୍ଷ ପୂର୍ବରୁ ମା ଗିରିଖଣ୍ଡ ବଡ଼ ପଥର ରୂପେ ସେହି ପବିତ୍ର ସ୍ଥାନରେ ପୂଜିତ ହୁଅଉଥିଲେ। ବିପଦ-ଆପଦ ସମୟରେ ହେଉ କିମ୍ବା ବିବାହ, ବ୍ରତଘରା ପରି ଆନନ୍ଦମୟ କାର୍ଯ୍ୟକ୍ରମ ସମୟରେ, ଅନ୍ତଃବାସୀମାନେ ପ୍ରଥମେ ମା ଙ୍କର ପୂଜା ଅର୍ଚ୍ଚନା କରି ତାଙ୍କର ଆଶୀର୍ବାଦ ଗ୍ରହଣ କରନ୍ତି। ମା ଙ୍କ ଶାନ୍ତ ଓ ଆଶୀର୍ବାଦମୟ ମୁଦ୍ରା ଭକ୍ତମାନଙ୍କ ହୃଦୟରେ ଆନନ୍ଦ ଓ ସାହସ ସୃଷ୍ଟି କରେ। ସେ ମନକୁ ଦୃଢ଼ କରି ଶରୀରରେ ଅମାପ ଶକ୍ତି ଭରିଦିଅନ୍ତି।

ଉଣେଇଶହ ସତସ୍ତରୀ (1977) ମସିହାରେ ଆଚାର୍ଯ୍ୟ ବିହାର ହାଉସିଂ ବୋର୍ଡ୍ ପ୍ରତିଷ୍ଠା ପରେ ଏଠାରେ ମା ଙ୍କ ପ୍ରତି ଭକ୍ତି ଓ ବିଶ୍ୱାସ ବଢ଼ିଥିଲା। ପରବର୍ତ୍ତୀକାଳରେ 1990 ମସିହାରେ ମନ୍ଦିର ନିର୍ମାଣ ସହ ମା ଙ୍କ ବାମ ପାର୍ଶ୍ୱରେ (ଦକ୍ଷିଣ ଦିଗରେ) ପ୍ରଭୁ ଶ୍ରୀ ଲକ୍ଷ୍ମୀନାରାୟଣଙ୍କ ଏବଂ ତାହାର ଦକ୍ଷିଣକୁ ପ୍ରଭୁ ଶ୍ରୀ ଲୋକନାଥଙ୍କ ମନ୍ଦିର ପ୍ରତିଷ୍ଠା ହୋଇଥିଲା। ଏହା ଆଚାର୍ଯ୍ୟ ବିହାରକୁ ଏକ ଗୁରୁତ୍ୱପୂର୍ଣ୍ଣ ଆଧ୍ୟାତ୍ମିକ କେନ୍ଦ୍ରରେ ପରିଣତ କରିଥିଲା।

ଦୁଇ ହଜାର ଚାରି (2004) ମସିହାରେ ଶ୍ରୀ ହନୁମାନ ମନ୍ଦିର, 2007 ମସିହାରେ ଶ୍ରୀରାମ ମନ୍ଦିର, 2009 ମସିହାରେ ମା କାଳୀଙ୍କ ମନ୍ଦିର ଏବଂ 2015 ମସିହାରେ ଶ୍ରୀ ଜଗନ୍ନାଥଙ୍କ ମନ୍ଦିର ପ୍ରତିଷ୍ଠା ହୋଇଥିଲା। ପବିତ୍ର ରଥଯାତ୍ରାର ଶୁଭାରମ୍ଭ ଭକ୍ତମାନଙ୍କ ମନରେ ଅପାର ଆନନ୍ଦ ଭରିଦେଇଥିଲା।

ମନ୍ଦିର ପ୍ରତିଷ୍ଠାରେ ଯେଉଁ ସଭ୍ୟମାନେ ଅବଦାନ ରଖିଥିଲେ, ସେମାନଙ୍କ ମଧ୍ୟରୁ ଅନେକେ ଆଜି ସ୍ୱର୍ଗସୀଧାରିଛନ୍ତି, କିନ୍ତୁ ଆଚାର୍ଯ୍ୟ ବିହାରବାସୀମାନେ ସେମାନଙ୍କୁ ଆଜିଯାଏ ସ୍ମରଣ କରନ୍ତି। ସ୍ୱର୍ଗତ ଉଦୟନାଥ ଦାସ ପଣ୍ଡିତ, ଲିଙ୍ଗରାଜ ମହାନ୍ତି, ବିଦୟ କୁମାର ପଣ୍ଡା, ଶେଷ ଦେବ ପଣ୍ଡା, ଗନ୍ଧର୍ବ ସାହୁ ଓ ଅନ୍ୟାନ୍ୟ ଭକ୍ତମାନଙ୍କ ଅବଦାନ ସ୍ମରଣୀୟ।

ଏଠାରେ ବାର ମାସରେ ତେର ପର୍ବ ଉତ୍ସବ ଆୟୋଜିତ ହୁଏ। ପଣା ସଂକ୍ରାନ୍ତି, ଭିତର ଚନ୍ଦନ, ଶିବ ବିବାହ, ଦେବସ୍ନାନ ପୂର୍ଣ୍ଣିମା, ରଥଯାତ୍ରା, ବାହୁଡ଼ା ଯାତ୍ରା, ସୁନା ବେଶ, ଜନ୍ମାଷ୍ଟମୀ, ବାସନ୍ତୀ ଦୁର୍ଗା ପୂଜା, ଶାରଦୀୟ ଦୁର୍ଗାପୂଜା, କାଳୀପୂଜା, ଧନୁର୍ ଓ ମକର ସଂକ୍ରାନ୍ତି, ସରସ୍ୱତୀ ପୂଜା, ଶିବରାତ୍ରି, ଦୋଳଯାତ୍ରା, ପ୍ରତିମାସର ଏକାଦଶୀ ଓ ନାମ ସଂକୀର୍ତ୍ତନ ଆଦି ପର୍ବଗୁଡ଼ିକ ଭକ୍ତିଭାବରେ ପାଳିତ ହୁଏ।

ମନ୍ଦିର ପରିସର ବଡ଼ ନ ହେଲେ ମଧ୍ୟ ଆଚାର୍ଯ୍ୟ ବିହାରବାସୀଙ୍କର ମା ଙ୍କ ଉପରେ ପ୍ରଗାଢ଼ ଭରସା, ପରସ୍ପର ସୁସମ୍ପର୍କ ଓ ପରିଚ୍ଛନ୍ନତା ପ୍ରତି ଆଗ୍ରହ ଏହି ପୀଠକୁ ଭୁବନେଶ୍ୱରର ଏକ ଆକର୍ଷଣୀୟ ଆଧ୍ୟାତ୍ମିକ କେନ୍ଦ୍ରରେ ପରିଣତ କରିଛି। ଏଠାକୁ ଆସୁଥିବା ଭକ୍ତମାନେ ଦିବ୍ୟ ଶାନ୍ତି ଓ ଆତ୍ମିକ ସନ୍ତୋଷ ଅନୁଭବ କରନ୍ତି।